2Pe 1 | BEF | STEP | Simoni Pita nani Yesu Kilisitohi koko pana'a to aposolo nohuna bo, nani fayahi ya'ma nokoyobe. Afotifu, Hu'ma lamana hiti nohina bouba to Yesu Kilisitou lubuto bilata bouba lenele'mo bati higo lali suhi hite aitoga keheli ule'ale hilata'na mina'a suhi huto tito nohina'a bona'ise. Ya'ma koyoto nolepube.

2 Peter 1

1 Simoni Pita nani Yesu Kilisitohi koko pana'a to aposolo nohuna bo, nani fayahi ya'ma nokoyobe. Afotifu, Hu'ma lamana hiti nohina bouba to Yesu Kilisitou lubuto bilata bouba lenele'mo bati higo lali suhi hite aitoga keheli ule'ale hilata'na mina'a suhi huto tito nohina'a bona'ise.

Ya'ma koyoto nolepube. 2 Hu'mamofihi to Sipi Boti Yesuhi keheli emilenogo lenalitoga lenehe'mose'na yanauba to fuluna'auba molo emito huto holito buto mineno.

Hu'mau lele'mo eto huto elesa nolimibe

3 To lenali Yesuhi keheli bati hilenogo ai hetofa amuya'a guna molo lepoloto lenehe'menogo lamana hite mino lite bite minalabe. To ai'a fana mehena'a hiti bebe sose'na'a hiti lenalitoga guna moloto lepilube'mu elesa molo lepi'ehina yabe. 4 Ya huloto ai kaga lu molo leto'ehina'a hetofa hetofana'a to mina'a ti'ehina'a ya'ma limi'ehina yabe. Ya huto limigo legeya'a lalitoga huto hilenogo melugu bona'magihi enegekesa'ani enugufa'ani laga epesise kapolo mege'i nemalana anamofihi fililata kapolo lenali lenemegesa hu emite to Hu'mamofihi hetofa hapa'a, ya'ma babeyafa hite minalabe. 5 Ya hu'ehina'mu lenali keheli amuya melete nehinogo minete bebe sose'namofihi hapa'alo amuya melete minolatana yalo'i molo emilabe. To bebe selata nehanalo ya'ma Hu'mamofihi hapa'a kehelilata nohuta yalo molo emilabe. 6 Hu'mamofihi hapa'a kehelilatana komopatini mega lenugufa'a ni'ina kaba hulata nasana yalo'i molo emilabe. Yamofihi komopa'agu amuya melelenogo mine lite nebinogo ufeha'a hiti nasana huto fi siti bite minelatana yalo molo emilabe. Kehelite fi siti bise'na ya'ma Hu'mamofi kumu agoya hu emilatana nehana enali yalo molo emilabe. 7 Hu'mamofi kumu keta mehise agoya hu emilata hite neminana enali hepite koguna ite minolata nehana yamofito molo emilabe. Hepito koguna ite minolatanamofihi yalo'i komopatini hiti epite keke'i luse'na'alo molo emilabe. 8 Yanauba asaga bonatoga minoto fi tili tele nohinogomo Sipi Boti Yesu Kilisitohi hapa'a kehelilata nohune keheliya ite foya'a linogo futu'a lolo mehinogo minete legeya'a heno. 9 Luga'a enali nolunanaya, ya lite meminenogo enali kumu ma luto nolepube. Enali hapa'ani'mu enubu'ani fili ko'ehinamo suhi huto ni'ibe. Foipana'a kohe toto Hu'mau okala hu etoto le'mo lamana hu'ehina ya'ma ekesu ho'ehibe luto lilune.

10 Nigibo nalalu'nigita, lenali kumu ya'ma Hu'mau lenele'mo ho tito elesa molo lepi'ehina yamofihi legeya'a huto hilibe luto amuya malalo. Lenali ya hite, kosele kasele'i hete fa'mene'mu limite mekalana'mu yabe. 11 Ya hite nehinogo Sipi Botiuba linogo lenubuto bise'na bo Yesu Kilisitohi kapo'a minolata nohinanamofihi kasihi li hokolo hu lepelenogo keta mehise hite bite falalabe luto Hu'mau ya'ma lu molo lete'ehinamo ni'ibe.

12 Ananamofi kumu lenali ana'ina silaga'i alu lepi su ho'ehinamo ni'inagi lenegekesu mehenogo beto hilo. To ka lamana'a yamofihi komopa'agu amuya melete mine'ahana ya'ma kehelite mine'ahanalo bo lenali ana kagagu mino bati hite minete kosaba'i minoto ana ka'ya lu lepiba lu lepiba huto minalube'mu nohube. 13 Nani nubu hiti nohuto melugu minoto ka ya'ma lu lepiba lepiba huto lenele'mo topa topa halunaga kehelugo eto nohibe. 14 Nani kana hupamone minomo buto mega nugufa sapuya'a he'mito fililube luto lu'ehina keheli'ohube. Yamofihi ka'a Sipi Boti Yesu Kilisitou lu huto huto lu nimigo nolube. 15 Ya hu'ehina'mu fililenogo'ni lenali kaga ya'ma le'mo kosaba kosaba hite lite kehelilete biba biba hite minalabe luto noluto amuya malalube'mu ya nohube.

Pitau ai kohe toto bo nohuto minoto silaga'na bu go bati hu'ehina

16 Nani Sipi Boti Yesu Kilisitohi nehetilina'a amuya'a hiti yamofihi ka'a lu lepilugi ya'ma kilihe kaga li pili meko'ohunagi to ana huto kilihe ka mone lolo mehu'ohuna yabe. Minose'nalo minoto kokuluma fana meha'a huto higo nani'ni nubu legeya'atu bu go'ohube. 17 Ya nohuto'ni pana'alobo'a luga'a hiti lali ya'ma hepifa kosalo li nupa huto nohutogo kaga mone ma luto kokulumaguti limi'ehina keheli'ohutamo ni'ibe. Yamofihi Hu'mau afotifihi gi'a le'mo ho tinogo fana mehena'a fi fana to letenogo kokulumagu ya'ma sipi fana meha'a hiti bouba aitogati nogo'a moloto kaga ya'ma luto ma luto limi'ehinamo ni'ibe: Pana'ni lamana'a moneko ya'ma nohibe. Ai'i ya'ma bu nogogo nibita nohibe. Ya noligo laliti akeheli'ohuta yabe.

19 To lali ya'ma koyapa mono ka'a lu huto huto bo enali lu yege hose ka'animu ya'ma fifa ilototi li pili ko'ohune Ya'ma kaga lamana'a nelinogo yamofihi kaba hite keheliya inogo lamana'a lolo holito buto tilata nohibe. Yanauba libi suhi huto metepugu fi fana to'ehibe. Lenali ya suhi hite nehinogo lenubu go fe lilete nehinogo go'i luto fana talibe. To sonofi'i sipi ofu suhi huto Yesuhi fana meha'auba komopatini fi fana talibe. 20 To kana'a mone ya lite kehelite keheliya ilo. Lu huto hu'ehina ka mone mono bukugu fayahi keye mele'ahana yamofihi hapa'aya bona'i luga'amagihi enali komopa'aniguti kehelilete nelanamofihi meni'ibe. 21 Ya'ma lu huto hu'ehina ka mone'ya bona'magita kehelite komopa'anitu li bati hilete mone meli'ahabe. Bona'magi enali Hu'mamofihi hetofa Sikalafu'uba enele'mo babahi higo Hu'mamofitogati kaga'a kehelite minete lu yege he'ahanamo ni'ibe.